Birinci Türkoloji Qurultayın elmi irsinin dərindən öyrənilməsi və onun tarixi əhəmiyyətinə obyektiv qiymət verilməsi istiqamətində tədqiqatlar yeni mərhələyə qədəm qoyur. Hazırladığım “Birinci Türkoloji Qurultayın dərsləri” kitabı qurultayda səsləndirilən məruzələrin elmi məzmununu, müzakirə olunan məsələləri və qəbul edilən qərarları geniş araşdırır.

Bunu AZƏRTAC-a açıqlamasında XII Bakı Beynəlxalq Kitab Sərgisi çərçivəsində nəşrin təqdimat mərasimində akademik Nizami Cəfərov bildirib.

O qeyd edib ki, Birinci Türkoloji Qurultayın 100 illiyi ilə əlaqədar Azərbaycanda bu tarixi hadisəyə həsr olunan çoxsaylı kitablar işıq üzü görüb. Hər bir tədqiqatçı qurultayın müxtəlif aspektlərini araşdırsa da, təqdim olunan dərs vəsaitində əsas diqqət məhz elmi-türkoloji məsələlərə yönəldilib.

Akademikin sözlərinə görə, dərs vəsaiti tələbələr, Birinci Türkoloji Qurultayı öyrənən tədqiqatçılar və geniş oxucu kütləsi üçün nəzərdə tutulub. Nəşrdə qurultayda təqdim olunan məruzələrin elmi məzmunu ayrı-ayrı bölmələr üzrə təhlil olunur.

N.Cəfərov vurğulayıb ki, kitabda türk alimləri və ziyalılarının qurultayda hansı məsələləri müzakirə etdikləri, hansı qərarları qəbul etdikləri, bu qərarların nə dərəcədə həyata keçirildiyi və bunun səbəbləri ətraflı təhlil edilir.

Akademik bildirib ki, uzun müddət Birinci Türkoloji Qurultayın elmi irsinə düzgün qiymət verilməsi ilə bağlı müəyyən çətinliklər mövcud olub. Qurultayın 100 illiyi çərçivəsində aparılan tədqiqatlar isə bu məsələlərin daha dərindən öyrənilməsinə imkan yaradır.

N.Cəfərov, həmçinin xatırladıb ki, Birinci Türkoloji Qurultayın Bakıda keçirilməsi Azərbaycan alimlərinin bu mövzuya xüsusi diqqət və həssaslıqla yanaşmasını şərtləndirir. Digər türk respublikalarında da qurultaya dair araşdırmalarda Bakıda aparılan elmi tədqiqatlara istinad olunur.