Vahid informasiya məkanının formalaşdırılması Türk dünyası üçün xüsusi əhəmiyyət daşıyır. Bizi ortaq çoxəsrlik tariximiz, dilimiz, zəngin mədəni irsimiz, mənəvi dəyərlərimiz birləşdirir. Əsas məqsədimiz həmin tarixi bağların gündəlik informasiya mübadiləsində də öz əksini tapmasını, xalqlarımızın bir-birinin həyatından, əldə etdiyi nailiyyətlərdən, həyata keçirdiyi təşəbbüslərdən daha yaxından xəbərdar olmasını təmin etməkdir.

AZƏRTAC xəbər verir ki, bu sözləri Qırğızıstanın Bişkek şəhərində keçirilən Türk Dövlətləri Parlament Assambleyasının (TÜRKPA) 15-ci plenar iclasındakı çıxışı zamanı Milli Məclisin deputatı, Mədəniyyət komitəsi sədrinin müavini, TÜRKPA-nın Təhsil, mədəniyyət, sosial və humanitar məsələlər üzrə komissiyası sədrinin müavini Günay Əfəndiyeva deyib.

Deputat müasir dövrdə türk xalqlarının bütün sahələrdə inteqrasiyasının vacibliyini vurğulayaraq bildirib: “Unutmamalıyıq ki, bir-birimizi nə qədər çox tanıyacaq, biləcək, öyrənəcəyiksə, o qədər bir-birimizə yaxın və bugünkü dünya reallıqlarında o qədər güclü olacağıq. Prezident İlham Əliyevin də vurğuladığı kimi, “Türk dünyası bizim ailəmizdir”. Bugünkü həssas beynəlxalq mühitdə bir ailəyə sahib olmaq, bir-birimizin dəstəyini hiss etmək ortaq gələcəyimizə əmin şəkildə irəliləmək imkanı verir. Ona görə bizim həmrəylik ruhumuz hər gün qurduğumuz əlaqələrdə, atdığımız addımlarda və bölüşdüyümüz məsuliyyətdə özünü göstərməlidir”.

Günay Əfəndiyeva əməkdaşlığın daha artıq inkişafı üçün möhkəm təməlin olduğuna diqqəti çəkərək, mövcud potensialdan daha geniş istifadə olunmasının əhəmiyyətini vurğulayıb: “Şübhəsiz əməkdaşlığımızı daha da gücləndirməliyik. İnanıram ki, gələcəkdə daha sıx görüşərək, böyük aktivliklə yeni birgə layihələrdə iştirak edəcəyik”.