İqtisadiyyatımızın, cəmiyyətimizin, beynəlxalq əlaqələrimizin və digər sahələrdə olan prioritetlərimizin gerçəkləşməsində dövlət sizə investisiya edib, sizdən nəticələri gözləyir və sizə inanır.

AZƏRTAC xəbər verir ki, bunu elm və təhsil nazirinin müavini Həsən Həsənli xaricdə təhsil üzrə Dövlət Proqramı məzunları üçün keçirilən karyera sərgisinin açılış mərasimində deyib.

O bildirib ki, məktəbdən, bakalavriat və magistratura səviyyələrindən ən yaxşı nəticələrlə məzun olan gənclər bu gün xarici ölkələrin aparıcı universitetlərinin məzunları kimi sərgidə iştirak edirlər. Bu, Prezident İlham Əliyevin ölkə gənclərinə olan inamının ən gözəl sübutudur.

Nazir müavini qeyd edib ki, ölkənin ən dəyərli nemətlərindən biri olan insan kapitalının inkişafı, “qara qızıl”ın “insan qızılı”na çevrilməsi strategiyası çərçivəsində Dövlət Neft Fondunun vəsaitinin gənclərin gələcəyinə yönəldilməsi çox ciddi strateji qərardır.

O vurğulayıb ki, həmin vəsaitin infrastruktur, enerji layihələri və yenidənqurma kimi digər istifadə istiqamətləri də var. Xaricdə təhsil proqramının maliyyələşdirilməsi standart və hamı tərəfindən qəbul edilmiş bir reallıq deyil. Bu, həqiqətən də çətin seçimdir. Lakin Azərbaycan dövləti bu seçimi edib və 2007-ci ildən etibarən məhz Dövlət Proqramı çərçivəsində həyata keçirib. Artıq bunun nəticələri görünür.

Nazir müavininin sözlərinə görə, bəzən məzunların özləri belə fərqinə varmadan taleyüklü məqamlarda iştirak etmələri bütöv bir sahənin, sənayenin və ya dövlət qurumunun fəaliyyət nəticələrini və məhsuldarlığını təkmilləşdirə, onları yeni zirvələrə qaldıra bilər. Dövlət Proqramının əsas ideyası və mənası da bundan ibarətdir.

O qeyd edib ki, proqram iştirakçıları Azərbaycan gəncləri arasından seçilərək ölkənin ən ciddi və əhəmiyyətli sahələrində dəyişikliklər etmək məqsədilə xaricə təhsil almağa göndəriliblər. Bu məsuliyyət hər bir məzunun şüurunda olmalı və daim yadda saxlanılmalıdır.

Nazir müavini çıxışının sonunda hər bir məzuna uğurlar arzulayıb və onların üzərlərinə düşən vəzifələrin öhdəsindən yüksək səviyyədə gələcəklərinə əmin olduğunu bildirib.