Azərbaycan alimləri Bişkekdə Türkiyə Cümhuriyyətinin Mədəniyyət və Turizm Nazirliyi, Qırğız Respublikasının Mədəniyyət, İnformasiya, İdman və Gənclər Siyasəti Nazirliyi, Qırğızıstan-Türkiyə Manas Universiteti və Türk Arxeoloji və Mədəni Miras İnstitutunun təşkilatçılığı ilə keçirilən “Türk dünyası arxeologiyası, araşdırma və arxeometriya simpoziumu”nda iştirak ediblər.

Simpoziumda AMEA Arxeologiya və Antropologiya İnstitutunun Xəzər arxeologiyası şöbəsinin müdiri professor Abbas Seyidov və dosent Leyla Rüstəmova “Xəzər dənizinin səviyyə dəyişmələri üçün süni intellekt bazasında platforma - selinus pilot layihəsi”, İlk Tunc dövrü arxeologiyası şöbəsinin müdiri dosent Səfər Aşurov “Azərbaycanın şimal-şərqində yeni arxeoloji araşdırmalar və onların türk tarixində yeri” adlı məruzələrlə çıxış ediblər.

Bu barədə AZƏRTAC-a institutdan bildirilib. Həmçinin simpoziumda institutun elmi işçisi Pəri Ağayevanın “Azərbaycan türklərində ənənəvi dəfn adətlərinin müasir təzahürü: arxeoloji və etnoqrafik yanaşma”, dosent Bəhlul İbrahimli, böyük elmi işçilər Lola Hüseynova və Sevinc Hüseynovanın həmmüəllifləri olduqları “Xaraba Gilan abidə kompleksinin 2 saylı türbəsi: Elxanilər dövründə memarlıq, dəfn adətləri və maddi mədəniyyət” mövzularında məruzələri təqdim edilib.

Eyni zamanda, simpoziumda AMEA-nın Naxçıvan Bölməsindən professor Vəli Baxşəliyevin “Naxçıvanda Halaf və Ubeyd mədəniyyətlərinin izləri” mövzusunda məruzəsi canlı, elmi işçi Elmar Baxşəliyevin “Gəmiqaya petroqliflərində Yaxın Şərq motivləri” mövzusunda məruzəsi isə onlayn formatda dinlənilib.

Məruzəçilər Türk dünyasının müxtəlif ölkələrindən Bişkekə toplaşmış elm adamlarına Azərbaycan arxeoloqlarının son illər əldə etdiyi nailiyyətlər barədə geniş məlumat veriblər.