Türkiyənin Antalya şəhərində görkəmli Azərbaycan bəstəkarı İlyas Mirzəyevin skripka və simfonik orkestr üçün yazdığı 2 nömrəli konsertonun dünya premyerası keçirilib. Konsert yunanıstanlı dirijor Nikos Haliassas rəhbərliyi ilə Antalya Simfonik Orkestrinin ifasında təqdim olunub. Skripka partiyasını isə Olgu Kızılay ifa edib.

AZƏRTAC xəbər verir ki, Türkiyənin Mədəniyyət və Turizm Nazirliyinin dəstəyi ilə “Sənətdə 50 il” mövzusunda həyata keçirilən yaradıcı layihə çərçivəsində əsərin ölkənin müxtəlif şəhərlərində səsləndirilməsi nəzərdə tutulur. Növbəti təqdimatın oktyabrın 23-də İzmir şəhərində baş tutması gözlənilir. Bu dəfə əsər İzmir Simfonik Orkestrinin ifasında, tanınmış dirijor və professor Lengin Göytəmenin rəhbərliyi ilə səsləndiriləcək.

Konsert proqramında İlyas Mirzayevin 2 nömrəli skripka konsertosu ilə yanaşı, Jorj Bizenin “Karmen” süitasının 1 və 2 nömrəli süitalarından seçilmiş parçalar da yer alıb.

Əsərin əsas mövzusu dünyada insanlar və dövlətlər arasında baş verən müharibələr, anlaşılmazlıqlar və qarşıdurmalardır. Kompozisiyanın ikinci hissəsi bütün çətinliklərə baxmayaraq həyatın davam etməsini, təbiətin yenidən canlanmasını və dirçəlişi simvolizə edir. İnsan itkilərinə baxmayaraq quşların oxuması, çiçəklərin açması və ağacların budaqlanması həyatın öz axarında davam etdiyini xatırladır.

Əsərin sonrakı hissəsində isə müharibə mövzusu yenidən ön plana çıxır. Finalda səslənən zənglər isə dostluğun, insanlığın və qarşılıqlı anlaşmanın qalib gələcəyinə işarə edir. Beləliklə, bəstəkar musiqi vasitəsilə müharibənin ağrılarını ifadə etməklə yanaşı, sülhə və ümidə çağırış edir.

Əsərin ifasının mürəkkəb olduğunu vurğulayan yunanıstanlı dirijor kompozisiyanın aktuallığını və bədii dəyərini qeyd edib.