Hüseyn Cavidin Ev Muzeyinin direktoru, filologiya elmləri doktoru Gülbəniz Babaxanlının “Ümummilli lider Heydər Əliyev – Hüseyn Cavid irsinin böyük hamisi” adlı monoqrafiyası işıq üzü görüb.

Əsər Prezident İlham Əliyevin 2023-cü ilin Azərbaycanda “Heydər Əliyev İli” elan edilməsi və Ulu Öndərin 100 illik yubileyi münasibətilə nəşr olunub.

Kitabda Ümummilli Lider Heydər Əliyevin təşəbbüsü ilə mütəfəkkir-şair Hüseyn Cavidin xatirəsinin əbədiləşdirilməsi üçün nəşinin uzaq Sibirdən gətirilməsi, mənəvi bəraət alması, ev muzeyinin təşkili, yubileylərinin dövlət səviyyəsində qeyd olunması, yaradıcılığının tədqiqi və nəşri üçün xüsusi sərəncamlar imzalaması və s. xidmətlərindən bəhs edilib.

Monoqrafiyada Ümummilli Liderin Hüseyn Cavid ailəsinin son yadigarı, Cavidlər irsinin mühafizi Turan Cavid ilə rəsmi yazışmalarından da bəhs olunub. Məlumdur ki, Ulu Öndər Heydər Əliyevlə yanaşı, Turan Cavidin də ədibin yaradıcılığının təbliğində misilsiz xidmətləri olub. Belə ki, mədəni irsimizin böyük hamisi Heydər Əliyevlə dahi şair və mütəfəkkir Hüseyn Cavid arasında mənəvi körpü rolunu oynamış Turan Cavid ədibin ev muzeyinin açılışına, Naxçıvanda məqbərəsinin ucaldılmasına qədər Ümummilli Liderlə birlikdə çiyin-çiyinə uzun bir mübarizə yolu keçmiş və onun bədii əsərlərinin elmi-tənqidi mətnini hazırlayıb, imla təhriflərindən təshih edərək orijinalına uyğun nəşr etdirməyə müvəffəq olmuşdur. Bu baxımdan yeni nəşr cari ildə anadan olmasının 100 ili tamam olan həm Ulu Öndər Heydər Əliyevin, həm də Cavidlərin son yadigarı Turan Cavidin yubileylərinə layiqli töhfədir.

Qeyd edək ki, Hüseyn Cavidin Ev Muzeyinin Elmi şurasının müvafiq qərarı ilə nəşr olunan bu monoqrafiyanın elmi məsləhətçisi AMEA-nın prezidenti, akademik İsa Həbibbəyli, elmi redaktoru AMEA-nın Məhəmməd Füzuli adına Əlyazmalar İnstitutunun baş direktoru, akademik Teymur Kərimlidir.
mənbə;www.science.gov.az .