Hər kəsin sevimli meyvəsi olan yaşıl alçanın faydaları kifayət qədərdir. Alçanın tərkibində A, C, K vitaminləri, kalium, fosfor mineralları, beta-karoten, lutein və zeaksantin kimi antioksidan birləşmələr var.

Bu barədə Aztibb.az-a məlumat verən həkim-endokrinoloq Fərhad Burzu bildirib ki, yaşıl alça aşağı qlisemik indeksli bir meyvə olmaqla, qanda şəkər səviyyəsini kontrolda saxlayır, C vitamin zənginliyi sayəsində immun sistemini gücləndirir.

Endokrinoloq qeyd edib ki, alça antioksidant təsir göstərərək ürək sağlamlığını qoruyur, arıqlamağa kömək edir, qəbzliyin qarşısını alır.

Həkim bu meyvənin göz sağlamlığı üçün də faydalı olduğunu söyləyib. Bildirib ki, alça, həmçinin ağız və diş sağlamlığını qoruyur, antioksidant xüsusiyyəti ilə ağızdakı pis qoxunu yox edir.

"Alçanı duzla yemək zərərlidir. Çünki, çox miqdarda duz qəbulu orqanizmdə ödemə səbəb olur. Ürək, böyrək və sümük sağlamlığına mənfi təsir göstərə bilər. Bundan əlavə, ac halda yüksək miqdarda yeyilən alça mədə pozğunluğu olan insanlarda qaz əmələ gəlməsinə səbəb ola bilər", - deyə Fərhad Burzu əlavə edib.