İkitərəfli əməkdaşlıq memorandumu çərçivəsində İ. M. Seçenov adına Birinci Moskva Dövlət Tibb Universiteti Bakı filialının IV, V, və VI kurslarının tələbələri "Fövqəladə hallar təbabəti", "Daxili xəstəliklər" və digər fənlər üzrə praktiki dərsləri Dövlət Gömrük Komitəsi Tibbi Xidmət İdarəsinin Mərkəzi Hospitalının klinik bazasında keçirlər.

Mərkəzi Gömrük Hospitalından Aztibb.az-a verilən məlumata görə, hospitalın bazasında tələbələrə tədris edilən "Fövqəladə hallar təbabəti" kursunun proqramına uyğun olaraq, “Fövqəladə hallarda əhalinin çeşidlənməsi və təxliyəsi”, "Qıcıqlandırıcı kimyəvi mayelərlə zəhərlənmələr", "Texniki maddələrlə intoksikasiya", "Radiasiyadan qorunmanın tibbi vasitələri və radiasiya qəzaları zamanı tibbi yardım", "Nəqliyyat, partlayıcı və yanğın təhlükəli fövqəladə hallarda tibbi yardımın təşkili" və digər aktual mövzular üzrə təcrübə seminarları təşkil olunur.

Gömrük Hospitalının bazasında yaradılmış unikal elmi və kliniki tədris şəraiti tələbələrə müasir səviyyədə həm nəzəri biliklərin, həm də praktiki bacarıqların öyrədilməsinə və onların mənimsənilməsinə imkan verir.