Xirnik meyvəsinin tərkibində çox miqdarda təbii karbohidrat var ki, bu da həmin meyvəni enerji deposu kimi qiymətləndirməyə imkan verir.

Aztibb.az xəbər verir ki, həkim-fitoterapevt Fizuli Hüseynov bu meyvənin bol-bol yeyilməsinin bədəndə qlükozanın depolanmasına və sərt qış aylarında orqanizmi infeksiyalardan qorumağa yardım etdiyini deyib. Bildirib ki, xirnikin tərkibi yodla zəngindir. O, həm hamilə qadınların, həm də uşaqların ən sevimli meyvəsi olmalıdır. Çünki yod beyinin inkişafını, zehni fəaliyyəti artırır, uşaqların əqli cəhətdən qüsursuz doğulmasına yardımçı olur. Zob xəstəliyinin müalicəsində əvəzolunmaz bir qidadır, qadınlarda kistaların, düyünlərin və mastopatiyanın qarşısını alır.

"Həmçinin şərq xurmasının tərkibində olan büzücü təsirli tanin maddəsi mədə-bağırsaq yaralarının müalicəsini sürətləndirir. Şərq xurması yeyənlərdə sümük əriməsi və oynaq ağrılarına az rast gəlinir, həmçinin qanda hemoqlobin göstəricisini, yəni qanın faizini yüksəldir, başgicəllənmələrini aradan qaldırır. Xirniyin tərkibindəki karotin bizim gözlərimiz üçün əvəzsiz qidadır, karotin gözlərin görmə qabiliyyətini yaxşılaşdırır, dərini gözəl və sağlam edir, qaraciyəri təmizləyir, böyrək daşı və öd daşı xəstəliklərinin qarşısını alır", - deyə həkim bu meyvənin saymaqla bitməyən faydalarından bəhs edib.