Uşaqların sağlamlığından danışarkən onların oturuş formalarına da diqqət etmək əsas məsələlərdən biridir. Çünki uşaqlar xəbərimiz olmadan yanlış hərəkətlər edə bilir. Yanlış vərdişlərdən biri azyaşlıların "W" şəklində oturuşudur.

Aztibb.az-ın xəbərinə görə, həkim-pediatr Günay Rəsulova bu problemə dair vacib tövsiyələr verib.

Həkim qeyd edib ki, bu şəkildə oturmaq uşaqlarda bud-çanaq oynağı və dizin inkişafinı pozur:

"Vaxt keçdikcə bu uşaqlar ayaqlarını içəri doğru atmağa başlayır. Nəticədə, yerimə və qaçma zamanı problemlər yaranır. Bu oturuş vəziyyətini uşaqlar vərdiş halına gətirməməlidirlər. Vərdiş halına gəlmədən mütləq tərgitməlidirlər ki, gələcəkdə fəsadlar olmasın".

G.Rəsulova xüsusuilə "Mən də, atası da uşaq vaxtı belə oturmuşuq, heç bir şey olmayıb" fikrində olan valideynləri diqqətli olmağa çağırıb.