Əbu-Dabi görüşü doğrudan da çox müsbət atmosferdə keçdi. Hiss olunurdu ki, hər iki tərəf artıq sülh müqaviləsinin imzalanmasına doğru yekun addımlar atır.

Bu sözləri AZƏRTAC-a açıqlamasında Milli Məclisin deputatı Fariz İsmayılzadə deyib.

“Açıq qalan məsələlər, o cümlədən Zəngəzur dəhlizinin detalları, logistika, təhlükəsizlik təminatı, Azərbaycan vətəndaşlarının və malların maneəsiz keçidi – bütün bunlar uzun və ətraflı danışıqlar zamanı müzakirə olundu. Hesab edirəm ki, bu görüş bizi sülhə daha da yaxınlaşdırır. Artıq son addımlara doğru gedirik və ümid edirik ki, yaxın zamanlarda sülh müqaviləsinin mətni hazır olacaq. Bu sənəd ya birbaşa sülh müqaviləsi, ya da çərçivə sazişi formatında imzalana bilər”, – deyə deputat qeyd edib.

Fariz İsmayılzadə əlavə edib ki, Azərbaycanın ortaya qoyduğu qətiyyətli və mübariz diplomatiya artıq danışıqlarda da öz əksini tapır. “Bütün tələblərimiz, mövqeyimiz sənəddə öz əksini tapır. Azərbaycanın Zəfərindən sonra irəli sürülən bütün regional məsələlər – Zəngəzur dəhlizi, Minsk qrupunun fəaliyyətinin dayandırılması və digərləri bu sülh danışıqlarında nəzərə alınır”, – deyə Milli Məclisin deputatı vurğulayıb.