Azərbaycan Milli Elmlər Akademiyasının (AMEA) prezidenti akademik İsa Həbibbəyli Arxeologiya və Antropologiya İnstitutunun Astara rayonundakı arxeoloji ekspedisiyasının fəaliyyəti ilə yerində tanış olub.

AMEA-dan AZƏRTAC-a bildirilib ki, akademik İsa Həbibbəyli Alaşa kəndi ərazisində yerləşən Əlişa qalasında aparılan qazıntılara baxış keçirib, aşkarlanmış memarlıq qalıqları və arxeoloji materiallarla tanış olub. Ekspedisiyanın rəhbəri, tarix üzrə fəlsəfə doktoru, dosent Mikayıl Mustafayev görülən işlər barədə məlumat verib.

Qeyd olunub ki, Əlişa qalasında aparılan qazıntılar zamanı lotusvari formada inşa edilmiş, unikal su hovuzu kompleksi aşkar edilib. On ləçəkli, 1,5 metr diametrə malik bu hovuz Azərbaycanda sənədləşdirilmiş ilk belə memarlıq nümunəsidir. Qazıntılar zamanı, həmçinin orta əsrlərə aid tikililər, müxtəlif saxsı nümunələri və gümüş sikkələr də tapılıb.

Akademik İsa Həbibbəyli tapıntıların elmi əhəmiyyətini vurğulayaraq, kompleks tədqiqatların aparılmasının vacibliyini qeyd edib və müvafiq tövsiyələrini verib.