"Hamı mənim şəhər treklərini nə qədər sevdiyimi bilir. Ona görə də məqsədim dəyişməz olaraq qalır. Hədəf qalib gəlməkdir".

"Report" "Checkered Flag" nəşrinə istinadən xəbər verir ki, bunu "Formula 1" üzrə dünya çempionatında çıxış edən "Red Bull" pilotu Serxio Peres Azərbaycan Qran-prisi ilə bağlı danışarkən deyib.

33 yaşlı sürücü ötən mövsüm Bakıda yaxşı nəticə göstərdiklərini bildirib: "Yeni həftəsonu formatı işləri bir az çətinləşdirəcək. Lakin bütün komandalar üçün eyni vəziyyətdir. Bu səbəbdən sadəcə, Qran-priyə yaxşı start verməliyik. Yenidən sükan arxasına qayıtmağı səbirsizliklə gözləyirəm".

Qeyd edək ki, bu gün "Formula 1"də sərbəst yürüş və sıralama turu gerçəkləşəcək. Bakıda əsas yarış aprelin 30-da baş tutacaq.