Sentyabrın 25-də “Gülüstan” sarayında Çin Xalq Respublikasının 76-cı ildönümünə həsr olunmuş təntənəli qəbul keçirilib.

AZƏRTAC xəbər verir ki, tədbirdə Azərbaycan hökumətinin yüksəkvəzifəli rəsmiləri, diplomatik korpusun nümayəndələri, ictimaiyyətin tanınmış simaları, Çin icmasının üzvləri iştirak ediblər.

Çin Xalq Respublikasının Azərbaycandakı fövqəladə və səlahiyyətli səfiri Lu Mey qonaqları salamlayaraq qeyd edib ki, 76 il ərzində Çin xalqı Kommunist Partiyasının rəhbərliyi ilə milli şəraitə uyğun inkişaf yolunu seçib, sürətli iqtisadi tərəqqi və uzunmüddətli sosial sabitlik kimi möcüzələr yaradıb. “Çin yoxsulluqla mübarizədə böyük uğurlar qazanaraq 800 milyon insanı yoxsulluqdan xilas edib və hərtərəfli orta rifah cəmiyyəti qurub. Çinin nailiyyətləri yalnız öz xalqına deyil, bütün dünyaya fayda verir”, – deyə diplomat vurğulayıb.

Lu Mey bildirib ki, Çin iqtisadiyyatı illərdir qlobal artımın əsas mühərriklərindən biri olub və dünya iqtisadiyyatına 30 faizlik töhfə verib. Bu ilin ilk yarısında Çin iqtisadiyyatı 5,3 faiz artıb. Ölkə yüksəkkeyfiyyətli inkişaf və Çin tipli modernləşmə yolunu davam etdirərək dünya iqtisadiyyatına daha çox sabitlik və imkanlar qazandıracaq. “Çinin texnoloji yenilikləri açıq və inklüzivdir. Biz orijinal texnologiyalarımızı və innovasiyalarımızı dünya ilə bölüşməyə hazırıq”, – deyə Lu Mey qeyd edib.

Çıxışında Çin Xalq Respublikasının qlobal sülh və sabitlik uğrunda fəaliyyətini diqqətə çatdıran səfir Lu Mey Sədr Si Cinpinin irəli sürdüyü Qlobal Təhlükəsizlik Təşəbbüsü və Qlobal Sivilizasiya Təşəbbüsünün əhəmiyyətini vurğulayıb. O, həmçinin Çinin çoxtərəfliliyə sadiq olduğunu, ədalətli beynəlxalq idarəetmə sistemi qurmaq üçün beynəlxalq ictimaiyyətlə əməkdaşlığa hazır olduğunu bildirib.

Səfir Lu Mey xüsusi olaraq Azərbaycan-Çin münasibətlərinə toxunaraq qeyd edib ki, cari il ikitərəfli əlaqələr üçün həqiqətən məhsuldar olub. Prezident İlham Əliyevin Çinə iki rəsmi səfəri zamanı ölkələr arasında Əhatəli Strateji Tərəfdaşlıq haqqında Birgə Bəyanat imzalanıb, “Bir kəmər, bir yol”, yaşıl enerji və rəqəmsal iqtisadiyyat sahələrində mühüm razılaşmalar əldə olunub.

“Sədr Si Cinpin və Prezident İlham Əliyevin strateji rəhbərliyi sayəsində ikitərəfli münasibətlərimiz yeni zirvələrə yüksəlir. Liderlərimiz yalnız səmərəli işgüzar münasibətlər deyil, həm də səmimi şəxsi dostluq qurublar. Bu, ölkələrimiz arasında etimad, bərabərlik və dostluğun bariz nümunəsidir”, – deyə səfir vurğulayıb.

Çin səfiri bildirib ki, iki ölkə bir-birinin suverenliyini, müstəqilliyini və ərazi bütövlüyünü dəstəkləyir, həmçinin BMT, ŞƏT kimi beynəlxalq təşkilatlar çərçivəsində sıx əməkdaşlıq edir. İqtisadi-ticarət əlaqələri rekord həddə çatıb, Çindən Avropaya yük daşıyan dəmir yolu ekspresi ilə tranzit daşımaların həcmi isə ikiqat artmaq üzrədir. İnsanlararası mübadilə də intensivləşir, viza rejiminin sadələşdirilməsi nəticəsində qarşılıqlı səfərlər çoxalıb, azərbaycanlı gənclər arasında Çin dili və mədəniyyətinə maraq daha da güclənib.

Lu Mey çıxışını belə tamamlayıb: “Çin Azərbaycanla birlikdə dövlət başçılarımız arasında əldə olunan razılaşmaları tam şəkildə icra etməyə hazırdır. Əminik ki, Çinin və Azərbaycanın əhatəli strateji tərəfdaşlığı parlaq gələcəyə malikdir və xalqlarımıza daha çox fayda gətirəcək”.

Daha sonra tədbirdə Azərbaycan Respublikasının Baş nazirinin müavini Şahin Mustafayev çıxışında Azərbaycan-Çin münasibətlərinin keyfiyyətcə yeni mərhələyə qədəm qoyduğunu vurğulayıb.

“Ötən il Astanada dövlət başçılarımız tərəfindən imzalanmış Birgə Bəyanat ikitərəfli münasibətləri strateji tərəfdaşlıq səviyyəsinə yüksəldib. Cari ilin aprel ayında Prezident İlham Əliyevin Çinə dövlət səfəri çərçivəsində isə ölkələrimiz arasında Əhatəli Strateji Tərəfdaşlığın qurulması barədə Birgə Bəyanat imzalanıb və əməkdaşlığın mühüm sahələrini əhatə edən 20-dən çox sənəd qəbul olunub.

Bu gün bütün sahələrdə əlamətdar uğurlar qazanmış Çin Xalq Respublikası böyük beynəlxalq nüfuz qazanaraq dünyanın ən güclü dövlətlərindən birinə çevrilib. Çin Azərbaycanın əsas iqtisadi və ticarət tərəfdaşlarından biridir, eyni zamanda, ölkəmiz Çinin Cənubi Qafqazdakı ən iri ticarət tərəfdaşıdır. Bu ilin ilk yeddi ayında ticarət dövriyyəsi 26 faiz artıb.

1995-ci ildən 2025-ci ilin birinci yarısınadək Çindən Azərbaycana yönələn birbaşa investisiyaların həcmi 942,3 milyon ABŞ dolları təşkil edib. Azərbaycanın Çinə yatırdığı ümumi investisiyaların məbləği isə 2,1 milyard ABŞ dollarıdır ki, bunun 1,9 milyardı Dövlət Neft Fondu tərəfindən həyata keçirilib.

Azərbaycanın son illər yaşıl enerji gündəliyini fəal irəlilətməsi çərçivəsində Çin əsas tərəfdaşlardan biridir. Yaşıl enerji konsepsiyasının icrasında Çinin innovativ texnoloji potensialına güvənilməsi bu sahədə əməkdaşlığın strateji əhəmiyyətini təsdiqləyir.

Humanitar sahə də Azərbaycan-Çin münasibətlərində mühüm istiqamətlərdən biridir. Bu sahədə həyata keçirilən layihələr xalqlar arasında dostluq və qarşılıqlı anlaşmanı gücləndirir. Universitetlərdə Çin dili və ədəbiyyatı tədris olunur, Konfutsi institutları fəaliyyət göstərir.

Hazırda ikitərəfli münasibətlərin gündəliyi genişdir. Əməkdaşlıq iqtisadi-ticarət, nəqliyyat-logistika, energetika, kənd təsərrüfatı, rəqəmsal inkişaf, humanitar, turizm və digər sahələri əhatə edir. Dövlət başçılarının tapşırıqlarına uyğun olaraq bu məsələlər Hökumətlərarası Birgə Komissiya çərçivəsində diqqət mərkəzində saxlanılır”, - deyə Şahin Mustafayev əlavə edib.

Azərbaycan nümayəndə heyətinin bu ay Çinə işgüzar səfərinin baş tutduğunu qeyd edən Şahin Mustafayev qeyd edib ki, ölkəmiz 25-ci Çin Beynəlxalq İnvestisiya və Ticarət Sərgisində iştirak edib. “Ölkəmiz sərgidə “Invest in Azerbaijan” adlı milli stendlə təmsil olunub. Səfər çərçivəsində Azərbaycan-Çin Təbliği tədbiri və İnvestisiya üzrə İkili İşçi Qrupun ilk iclası keçirilib, sənədlər imzalanıb, Çinin müxtəlif region və müəssisələrinə səfərlər təşkil olunub.

“Azərbaycan ərazisindən keçən nəqliyyat dəhlizləri, Bakı Beynəlxalq Dəniz Ticarət Limanı, Bakı-Tbilisi-Qars dəmir yolu və digər layihələr ölkəmizin Çini Avropa ilə birləşdirən ən qısa və əlverişli marşrut kimi strateji rolunu daha da möhkəmləndirir.

Çin şirkətləri Azərbaycanda yaradılmış əlverişli və şəffaf biznes mühitindən səmərəli faydalanır. 2025-ci il avqustun 1-nə olan məlumata görə, ölkəmizdə sənaye, kənd təsərrüfatı, nəqliyyat, tikinti, ticarət və xidmət sahələrində 347 Çin şirkəti aktiv fəaliyyət göstərir.

Prezident İlham Əliyevin avqustun sonu-sentyabrın əvvəlində Çinə işgüzar səfəri zamanı Sədr Si Cinpinlə görüşü ikitərəfli münasibətlərə yeni təkan verib. Azərbaycan Prezidentinin “ŞƏT Plyus” Sammitində və Çinin qələbəsinin 80-ci ildönümünə həsr olunmuş tədbirlərdə iştirakı bir daha Azərbaycan-Çin münasibətlərinin strateji xarakterini təsdiqləyib və əməkdaşlığın böyük perspektivlər açdığını nümayiş etdirib.

Qarşılıqlı hörmət və etimada əsaslanan qədim və zəngin ənənələr üzərində qurulmuş Azərbaycan-Çin münasibətləri dinamik inkişaf etməkdədir. Prezident İlham Əliyev yaxın dost və etibarlı tərəfdaş olan Çinlə əməkdaşlığın genişləndirilməsinə xüsusi əhəmiyyət verir”, - deyə Şahin Mustafayev diqqətə çatdırıb.

Tədbir bədii hissə ilə davam edib. Tədbir iştirakçıları burada təqdim edilən sərgidə Çin mədəniyyətinin nümunələri ilə tanış olublar.