Martın 18-də - ilaxır çərşənbə günü Heydər Əliyev Mərkəzində Azərbaycan Respublikası QHT-lərə Dövlət Dəstəyi Agentliyinin xətti ilə "Türkman irsi: vətəndaş cəmiyyətlərinin həmrəyliyi" adlı forum keçiriləcək.

AZƏRTAC xəbər verir ki, Forumda İraq, Suriya və Türkiyədən 30-dan vətəndaş cəmiyyəti təmsilçisi iştirak edəcək. Onların arasında İraq parlamentinin Türkmanlar qrupunun sədri, ictimai-siyasi xadim Ərşad Saleh, İraq Tarixçiləri Birliyinin təmsilçisi, “Türkmaneli” qəzetinin baş redaktoru Najat Şükür, İraq türkmanlarının “Tert TV” kanalının rəhbəri Türkeş Saleh, Suriya Türkman Dərnəkləri Federasiyasının prezidenti Tarık Sulo Cevizci, Suriya Türkman Platformasının yaradıcısı Əsəd Arber və başqaları yer alır.

Forumda “Ortaq dəyərlər: tarix və mədəniyyətin izləri” və “Gələcəyə baxış: yeni imkanlar və təşəbbüslər” adlı panellərdə türkmanəsilli vətəndaş cəmiyyəti təmsilçiləri yerli QHT-lərlə birgə müzakirələr aparacaq.

Tədbirdən əvvəl – martın 15-17-də türkman qonaqlar İraqda yaşayıb-yaratmış dahi Azərbaycan şairi Məhəmməd Füzulinin şərəfinə adlandırılan Füzuli şəhərinə və işğaldan azad edilmiş digər ərazilərə - Şuşa, Xankəndi, Xocalı və Suqovuşana səfər edəcək, bayram şənliklərinə qatılacaq, Bakıda Zəfər parkını, Hərbi Qənimətlər Parkını və digər görməli yerləri ziyarət edəcəklər.

Martın 18-də - forumdan sonra türkman qonaqlarla birgə Bakıda Novruzun ilaxır çərşənbəsi qeyd olunacaq.

Mənbə: Azərtac