“Nəsimi poeziyasında insan himni” kollektiv monoqrafiyası işıq üzü görüb
İmadəddin Nəsiminin 650 illiyinə həsr olunmuş Moskvada keçirilən konfransın materialları kitab şəklində çap olunub.

Konfrans 2019-cu ildə Heydər Əliyev Fondunun Rusiya Federasiyasındakı nümayəndəliyi tərəfindən keçirilib. Konfrans zamanı Moskvada Nəsiminin büstünün açılışı olub. “Nəsimi poeziyasında insan himni (Şərq və Qərbin mənəvi və mədəni dəyərlərinin sintezi)” mövzusunda keçirilən konfransda AMEA-nın Nizami Gəncəvi adına Ədəbiyyat İnstitutunun alimləri də iştirak ediblər.

Konfransın təşkilatçıları arasında Rusiya EA Fəlsəfə İnstitutu, AMEA Nizami Gəncəvi adına Ədəbiyyat İnstitutu, AMEA Fəlsəfə İnstitutu, M.V.Lomonosov adına MDU-nun Asiya və Afrika ölkələri İnstitutu, Rusiya EA A.M.Qorki adına Dünya Ədəbiyyatı İnstitutu və başqaları da var.

Monoqrafiyanın elmi redaktorları filologiya elmləri doktoru F.Əzizova və akademik A.Kubelindir.

Monoqrafiyada AMEA-nın vitse-prezidenti, Nizami Gəncəvi adına Ədəbiyyat İnstitutunun baş direktoru, akademik İsa Həbibbəyli ilə yanaşı, institutun digər əməkdaşlarının da məqalələri yer alıb. Həmin məqalələrin müəllifləri Ədəbiyyat İnstitutunun Orta əsrlər Azərbaycan ədəbiyyatı şöbəsinin müdiri Fəridə Əzizova, Ortaq başlanğıc və intibah dövrü Azərbaycan ədəbiyyatı şöbəsinin müdiri İmamverdi Həmidov, Ədəbiyyat İnstitutunun direktor müavini Aygün Bağırlı və filologiya üzrə fəlsəfə doktoru Firudin Qurbansoydur.

Kollektiv monoqrafiyada Azərbaycandan başqa Rusiya, Qazaxıstan, Özbəkistan, Tacikistan, Ukrayna, Polşa, İngiltərə, Avstriya, Finlandiya alimlərinin də Nəsimi haqqında tədqiqatları nəşr olunub.
AMEA Xəbərlər.