Ankara, 7 yanvar, AZƏRTAC

Rəsmi Paris Fransa ilə Komor adaları arasında mübahisəli ərazi olan Mayotta departamentində tüğyan edən “Çido” qasırğası ilə bağlı dağıntıların miqyasını dünya ictimaiyyətindən gizlətməyə çalışır.

AZƏRTAC xəbər verir ki, bu barədə “İndependent Türkçe” nəşrinin icmalçısı Sare Şanlı yazır.

“Müstəmləkəçi yanaşmanın kölgəsində qalan faciə... Makronun Mayotta səfəri: “Fransanın bir hissəsi olduğunuza görə minnətdar olun” sərlövhəli nəşrin müəllifi qeyd edir ki, Fransanın ən yoxsul ərazisini vuran qasırğa Mayottanın onsuz da zəif olan infrastrukturunu məhv edib.

“Təbii fəlakətdən iki həftədən çox vaxt keçməsinə baxmayaraq, faciə qurbanlarının konkret sayı hələ də açıqlanmayıb. Fransa nümayəndələri adanın 31 sakininin həlak olması ilə bağlı bəyanatlarla məhdudlaşaraq faciənin miqyasını azaltmağa çalışırlar. Lakin, fakt odur ki, Mayottada çox sayda miqrant yaşayır. Eyni zamanda, cəsədlərin bir hissəsi tələsik dəfn edilib, bu da qurbanların həqiqi sayının minlərlə ola biləcəyini göstərir”, - deyə nəşr daha sonra qeyd edir.

Türkiyəli icmalçı vurğulayır ki, Mayotta Fransanın son vaxtlar təbii fəlakətlər və etirazlar kontekstində müzakirə olunan xaricdəki mülklərindən sadəcə biridir.

“Qasırğadan sonra Mayottaya səfər edən Fransa Prezidenti Emmanuel Makron qəzəbli insan kütləsi ilə qarşılaşıb. Ada sakinləri Fransa hökumətinin böhranın nəticələrini aradan qaldırmaq üçün atdığı addımları pisləyib, Makronun istefasını tələb edərək, onu fitə basıblar. “Mən qasırğa deyiləm! Mən baş verənlərə görə məsuliyyət daşımıram”, - deyə özünə bəraət qazandıran Makron, Mayotta sakinlərini “Fransanın bir hissəsi olduğuna görə minnətdar olmağa” çağırıb. “Fransa olmasaydı, sizin vəziyyətiniz 10 min dəfə daha pis olardı”, - deyə siyasətçi vurğulayıb.

“Bununla belə, o xatırlamayıb ki, “Çido” qasırğasından zərər çəkən insanlara günlərdir tibbi yardım göstərilməyib, adanın əksər sakinləri içməli sudan məhrum olublar, humanitar yardım bir həftə sonra Mayottaya çatdırılıb.

Makronun hərəkətləri göstərdi ki, Fransa sırf müstəmləkə ölkəsi ruhunda hərəkət edərək Mayotta sakinlərinin problemlərini həll etməkdən uzaqdır. Fransa lideri ada sakinlərinin qeyri-bərabərliyini və yoxsulluğunu norma və təbii vəziyyət kimi təqdim etməyə çalışıb”, - deyə Şanli yazır və Mayotta əhalisinin hələ də su və elektrik enerjisindən adekvat istifadə imkanından məhrum olduğuna işarə edir. Eyni zamanda, Parisin “yardım siyasəti” problemlərin həllinə kömək etmir, böhranı yalnız daha sonrakı tarixə təxirə salır.

“Orta hesabla, Mayottada hər 10 evdən dördü faner və metal təbəqələrdən hazırlanır. Hər on evdən üçündə su yoxdur”, – deyə türkiyəli icmalçı daha sonra yazır və 2022-ci ildə adada işsizlik səviyyəsinin 34 faiz olduğunu xatırladır.

“Mayotta xalqı “ikinci dərəcəli” fransız olmaqdan yorulub. Fransanın Afrikada təsirinin azalması fonunda ada sakinləri müstəmləkəçiliyə qarşı mübarizədən dərs almalı və layiqli həyat hüququnu müdafiə etməlidirlər”, - deyə müəllif yazır.

Ramin Abdullayev

AZƏRTAC-ın xüsusi müxbiri

Ankara