18-20 dekabr 2021 tarixlərində Kistik Fibroz Xəstələrinə Yardım İctimai Birliyinin bir ildən bəri davam etdirdiyi onlayn "Azərbaycan-Turkiyə kistik fibroz müzakirələri" layihəsi çərçivəsində dəyirmi masa keçirilib.

Aztibb.az xəbər verir ki, tədbirdə Azərbaycan və Türkiyənin Səhiyyə nazirliklərinin, tibbi qurumların, kistik fibroz birliklərinin sədrləri, Marmara EAH xəstəxanasının Uşaq Ağciyər Xəstəlikləri şöbəsinin professor və uzman həkimlərindən ibarət heyəti iştirak edib.

Dəyirmi masada Azərbaycanı millət vəkili, Milli Məclisin Səhiyyə komitəsinin birinci müavini Rəşad Mahmudov, Səhiyyə Nazirliyinin baş neonatoloqu, ETMGİ YRİT şöbəsinin müdiri Rüstəm Hüseynov, Səhiyyə Nazirliyinin mütəxəssis eksperti, uzman pediatr-neanatoloq Erkin Rəhimov, Kistik Fibroz Xəstələrinə Yardım İctimai Birliyinin sədri Səadət Bayramova
Elmi Tədqiqat Pediatriya İnstitutunun və kliniki xəstəxanasının həkimləri təmsil ediblər.

İki gün davam edən tədbirə Rəşad Mahmudov başçılıq edib.

Dəyirmi masanın 1ci günündə professor Bülent Karadag Türkiyədə və Avropada standart müalicələr və yeni müalicə metodlarına dair müqayisəli şəkildə təqdimat edib.

Professor Yasemin Gökdəmir kistik fibroz xəstəliyi, diaqnostikası, yaxın ölkələr və Türkiyədə ən geniş rast gəlinən gen mutasiyalarına dair təqdimatla çıxış edib.

Uzman uşaq pulmonoloqu Aynur Quliyeva Marmara Universiteti Kistik Fibroz Mərkəzinin iş prinsipi, xəstəyə yanaşma və müalicə metodları haqqında məruzə edib.

Tədbirin ikinci günündə Erkin Rəhimov Kistik Fibroz Xəstələrinə Yardım İctimai Birliyinin təsisçilərindən biri olduğu üçün birliyin yaranma zərurətindən, 4 ildə görülən işlərdən, hazırda Azərbaycanda eyni xəstəlikdən əziyyət çəkən insanların tibbi xidmət və həyatı vacib dərmanlarla təmin olunması istiqamətində atılması planlaşdırılan addımlar haqqında ətraflı məlumat verib.

Kistik Fibroz Xəstələrinə Yardım İctimai Birliyinin sədri Səadət Bayramova kistik fibrozun aşkarlanma tarixinin 1938-ci il olmasına baxmayaraq ölkəmizdə geniş şəkildə maariflənmə işlərinin aparılmasının Kistik Fibroz Xəstələrinə Yardım İctimai Birliyi ilə bağlı olduğunu qeyd edib. O, bu tədbir ilə yeni bir mərhələnin başlanacağına və xəstələrin sağlam, keyfiyyətli yaşamalarına təkan verəcək addımların atılmasına səbəb olacağına əminliyini ifadə edib.

Daha sonra məruzələr ətrafına geniş müzakirələr aparılıb.

Tədbir iştirakçıları Azərbaycanda və Türkiyədə, eləcə də dünyada kistik fibrozlu insanların, xüsusilə uşaqların xəstəliklə bağlı yaşadıqları problemlər və gələcəkdə görüləcək işlərdən bəhs ediblər. Tədbirdə ölkəmizdə bu xəstəlikdən əziyyət çəkən insanların gələcək taleyinin həllində qanunvericiliklə yanaşı, icra strukturlarının beynəlxalq təcrübəyə uyğun iş planının hazırlanmasının vacib olduğu vurğulanıb. Həmçinin ilkin diaqnostikanın xəstələr üçün əlçatan olması, neonatal skrininq, genetik araşdırma, ictimaiyyətin, həkim və tibb personalının maarifləndirilməsi üçün ölkəmizdə kistik fibroz mərkəzlərinin yaradılmasına dair tədbirlər planının hazırlanması məqsədilə təkliflər irəli sürülüb.