Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.f.d. dosent İsmayıl Əfəndiyev və Mərkəzi Gömrük Hospitalının rəis müavini Rəna Qasımova “Azərbaycanda əhali arasında keçirilən COVİD-19-la bağlı davranışların qiymətləndirilməsi üzrə sorğunun nəticələri”nə həsr edilmiş vebinarda iştirak ediblər.

Aztibb.az xəbər verir ki, vebinar Ümumdünya Səhiyyə Təşkilatının (ÜST) Azərbaycan nümayəndəliyi tərəfindən “Sağlamlıq üçün Həmrəylik Təşəbbüsü” və “COVID-19 əleyhinə Vaksinasiyaya Dəstək” layihələri çərçivəsində təşkil olunub.


Sorğu ÜST, İctimai Səhiyyə və İslahatlar Mərkəzi tərəfindən Azərbaycan üzrə 1031 nəfər respondent arasında keçirilib. Sorğunun məqsədi əhali arasında COVID-19 virus infeksiyası və vaksinasiya prosesi ilə bağlı risk, davranış və digər faktorların monitorinqini aparmaq və onlar arasında əlaqələri qiymətləndirmək olub.

Həmçinin, təqdimatda COVID-19 pandemiyası kontekstində Azərbaycanda əsas tibbi xidmətlərin davamlılığı üzrə sorğunun nəticələri də müzakirə olunub. Vebinarda ÜST-nin mütəxəssisləri Marta Şerzer və Ardita Tahirukaj sorğunun nəticələrini elan edib. Sorğu sübuta əsaslanan məlumatlar əsasında pandemiya ilə mübarizə tədbirlərini mövcud qaydalara uyğunlaşdırmağa kömək edəcək.