2019-cu ildən qeyri-neft-qaz özəl sektorda əmək müqavilələrinin sayı iki dəfəyə yaxın artaraq bir milyonu ötüb.

AZƏRTAC xəbər verir ki, bunu iqtisadiyyat naziri Mikayıl Cabbarov Milli Məclisin noyabrın 19-da keçirilən plenar iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı deyib.

Nazir bildirib ki, əmək haqqı islahatı əmək bazarında böyük şəffaflaşma effekti yaradıb. Belə ki, qeyri-neft-qaz özəl sektorda 8000 manatadək əmək haqlarının gəlir vergisindən azad olunması nəticəsində 2019-cu il yanvarın 1-dən 2025-ci il noyabrın 1-dək qeyri-neft-qaz özəl sektorda əmək müqavilələrinin sayı 481,4 min artaraq bir milyonu ötüb, sektorun cəmi əmək müqavilələrində payı 38,5 faizdən 54,2 faizə yüksəlib.