Azərbaycanın xarici siyasəti və Prezident İlham Əliyevin liderliyi yalnız ölkənin daxilində yeni reallıqlar yaratmaqla kifayətlənmir, eyni zamanda, regionun tarixini yenidən formalaşdırmaq kimi mühüm bir missiyanı öz üzərinə götürür. Vaşinqtonda aparılan danışıqlar və əldə olunan razılaşma təkcə Azərbaycan üçün deyil, bütövlükdə region üçün strateji əhəmiyyətə malikdir və yeni mərhələnin başlanğıcını qoyur.

AZƏRTAC xəbər verir ki, bu fikirləri Milli Məclis sədrinin birinci müavini Əli Əhmədov parlamentin növbədənkənar sessiyası çərçivəsində “Vaşinqton razılaşmaları: sülh diplomatiyasının və müdrik liderliyin təntənəsi” mövzusunda keçirilən bugünkü xüsusi iclasda çıxışı zamanı səsləndirib.

O, Azərbaycan diplomatiyasının əldə etdiyi uğurları yüksək qiymətləndirib: “Azərbaycan iqtisadiyyatının dayanıqlığı, ordusunun gücü və dövlət idarəetməsində qazanılan uğurlar ölkəmizin nüfuzunu qlobal miqyasda artırıb. 2020-ci ildə əldə olunmuş Qələbə və ölkənin ərazi bütövlüyünün bərpası Azərbaycanın hərbi qüdrətinin və siyasi iradəsinin bariz nümunəsidir”.

Ə.Əhmədov vurğulayıb ki, diplomatik sahədə əldə edilən uğurların əsasında şəxsiyyət və liderlik amili dayanır: “Azərbaycanın diplomatik qələbəsinin simvolu Prezident İlham Əliyevdir. Bu, onun nüfuzunun və liderliyinin təntənəsidir. Vaşinqton danışıqlarından sonra dünya liderlərinin Prezident İlham Əliyevi təbrik etməsi bunun əhəmiyyətini bir daha sübut edir”.

Sədr müavini Vaşinqton razılaşmasının praktik əhəmiyyət daşıdığını, Azərbaycan-ABŞ tərəfdaşlığının möhkəmləndiyini və beynəlxalq iqtisadi əlaqələrin yeni mərhələyə keçdiyini bildirib. O, Prezident İlham Əliyevin təşəbbüsü ilə irəli sürülən Zəngəzur dəhlizi layihəsinin regional əməkdaşlıq üçün böyük imkanlar açdığını diqqətə çatdırıb və əlavə edib ki, bu layihəyə mane olmağa çalışan qüvvələr artıq bu niyyətlərindən geri çəkilməyə məhkum olacaqlar. O, Zəngəzur dəhlizinin reallaşmasının təkcə Azərbaycan üçün deyil, region ölkələri üçün də yeni və parlaq bir səhifə olacağını vurğulayıb.