Sentyabrda keçirilməsi planlaşdırılan Baku Jazz Festivalı 2022 şəhidlərin xatirəsinə ehtiramla əlaqədar ləğv edilib və noyabr ayına təyin edilib.

"Report" xəbər verir ki, noyabrın 15-dən 20-dək bu musiqi janrının pərəstişkarlarının gözlədiyi dinamik festival baş tutacaq.

Yenilənmiş proqram tanınmış xarici ifaçıların, dünya caz ulduzlarının adları ilə seçilir. Bu, ilk növbədə, Grammy mükafatı laureatı, isveçrəli ifaçı Qreqori Maretdir. Son onillikdə Qreqori müasir caz dünyasının geniş spektrində unikal və cəlbedici səsə çevrildi. Layihələrində əməkdaşlıq etdiyi musiqiçilərin siyahısı bunu deyir: Herbi Hancock, Pat Metheni, Kassandra Vilson, Markus Miller. Noyabrın 15-də Bakı Jazz Festivalı 2022 çərçivəsində Qriqori Maret Azərbaycan musiqiçiləri ilə birgə çıxış edəcək. Unikal layihədə Azərbaycan tərəfini parlaq gənc pianoçu Elbəy Məmmədzadə təmsil edəcək.

Noyabrın 16-da braziliyalı diva Eloiza Lourenso hərarətləndirici proqramla çıxış edəcək, daha sonra festival günləri hollandiyalı virtuoz pianoçu Mayk Del Ferronun, İsrailin Yogef Şetrit qrupunun, alman eksperimental caz vokalçısı Mixael Şifelin qrupunun konsertləri ilə davam edəcək. Bakı Jazz Festivalı 2022-nin proqramını əfsanəvi Kenni Uilerin yeni "Sweet Time Suite" tamaşasının solisti seçilmiş gitaraçı Federiko Kasaqrande və truba ifaçısı Fulvio Siqurtanın italyan dueti bağlayacaq.

Noyabrın 17-də gənc caz ifaçıları üçün illik “I am Jazzman” müsabiqəsinin ikinci turu, noyabrın 19-da Beynəlxalq Muğam Mərkəzində müsabiqənin qaliblərinin mükafatlandırılması və “Ekalogic”in yekun konserti keçiriləcək. Qeyd edək ki, bu il iştirak üçün müraciət edən müsabiqə iştirakçılarının sayı 63 nəfər olub və bu müsabiqənin təsis edildiyi vaxtdan rekorda imza atıb.

"Baku Jazz Festivalı" ənənəvi olaraq öz pərəstişkarlarına geniş proqram təqdim edir, burada konsertlərdən əlavə, incəsənət sərgiləri və caz mövzulu kino günləri təşkil olunur. Bu il istedadlı müasir rəssam Ramina Saadathan rəsmlər yaratdı və onları Rəqs edən Caz adlı layihədə birləşdirdi. Sərgidə tamaşaçılar caz sədaları altında yaradılmış rəsmlərin cazı necə rəqs edə bildiyinin şahidi olacaqlar. Noyabrın 17-də QGallery-də “Dancing Jazz” sərgisinin açılışı olacaq.

Növbəti maraqlı tədbir tanınmış kinoşünas Ülvi Mehdinin aparıcılığı ilə YARAT yaradıcılıq mərkəzində caz əfsanəsi Maylz Devis haqqında filmin təqdimatı olacaq.

"Baku Jazz Festivalı 2022"nin proqramı musiqi və incəsənətin parlaq elementlərindən yığılmış möhtəşəm tapmaca olacaq və payız mövsümünü gözəl şəkildə bağlayacaq.