Bitcoin”in qiyməti 80 min dollar səviyyəsindən aşağı düşüb.

AZƏRTAC xəbər verir ki, hazırda dünyanın əsas kriptovalyutasının qiyməti 79 min 989 dollardır.

Ekspertlərin fikrincə, ABŞ Federal Ehtiyat Sisteminin (FED) iclası ərəfəsində investorların riskli aktivlərdən uzaqlaşması və süni intellekt sektoruna dair narahatlıqların artması kriptovalyuta bazarına təzyiq göstərib. Nəticədə “Bitcoin”in qiyməti 80 min dollar həddindən aşağı düşüb.

Kriptovalyuta bazarında müşahidə olunan eniş ABŞ-də ticarət edilən spot “Bitcoin” birja fondlarından kapitalın kəskin çıxması və texnologiya şirkətlərinin səhmlərində qeydə alınan ümumi itkilərlə müşayiət olunub. “Bitcoin” yeni həftəyə ucuzlaşma ilə başlayıb.

“Ether”, “XRP” və “Solana” da daxil olmaqla, digər kriptovalyutaların qiymətində də azalma qeydə alınıb. Bu proses investorların həftənin əvvəlində 1 milyard dollardan çox xalis vəsait cəlb edən ABŞ-də qeydiyyatdan keçmiş spot “Bitcoin” birja fondlarından kəskin şəkildə vəsait çıxarması fonunda baş verib. Belə ki, cümə axşamı və cümə günləri həmin fondlardan ümumilikdə 772,4 milyon dollar vəsait çıxarılıb.

Bazarda geriləmə ötən həftədən etibarən genişlənən ümumi satış dalğası ilə eyni vaxta təsadüf edib. İnvestorlar süni intellekt sahəsinə yönəldilən böyükhəcmli xərclərin səmərəliliyini şübhə altına alır, sektorun gələcək perspektivlərini qiymətləndirmək üçün isə bu həftə texnologiya nəhənglərinin açıqlayacağı maliyyə hesabatlarını gözləyirlər.

Süni intellekt sektorunun vəziyyətini əks etdirən göstəricilərdən biri hesab olunan Cənubi Koreyanın “Kospi” indeksi 0,2 faiz azalıb. Yaponiyanın “Nikkei” indeksində isə çip istehsalı ilə əlaqəli şirkətlərin səhmləri ən çox ucuzlaşanlar arasında yer alıb.

Analitiklər bildirirlər ki, “Bitcoin” indiyədək bütün riskli aktivlərə təzyiq göstərən süni intellektlə bağlı borclanma narahatlıqlarına nisbətən davamlılıq nümayiş etdirib. Hazırda bazar iştirakçılarının diqqəti FED-in iclasına, daha sonra isə ABŞ-də keçiriləcək aralıq seçkilərə yönəlib.