Azərbaycan Tibb Universitetinin (ATU) Müalicə-profilaktika fakültəsinin İnsan anatomiyası və tibbi terminologiya kafedrasının dosenti, fakültə üzrə akademik məsləhətçi, tibb üzrə fəlsəfə doktoru Sədaqət Rüstəmova Türkiyənin Niğde Ömer Halisdemir Universitetində dərs deyib.
Aztibb.az xəbər verir ki, bu dəvət Türk Dövlətləri İnkişaf Birliyinin Azərbaycan və Türkiyə arasında Orhun Mübadilə Proqramı Protokolu və professor-müəllim heyətinin razılaşdırılmış mobillik proqramı çərçivəsində baş tutub.
S.Rüstəmovanın sözlərinə görə, səfər zamanı həmin universitetin tədris prosesi ilə yaxından tanış olmaq imkanı qazanıb:
"İki həftə ərzində Niğde Ömer Halisdemir Universitetinin Tibb fakültəsində I kurslar üçün mərkəzi və periferik sinir sisteminin anatomiyası, sinir sistemi haqqında ümumi məlumat, sinir sisteminin quruluş elementləri barədə mühazirələr oxumuşam. Bundan əlavə, beyin və onurğa beyninin anatomo-topoqrafik quruluşu, inkişafı, yaş xüsusiyyətləri, kəllə sinirləri, onurğa beyni sinirləri, vegetativ sinir sistemi haqqında tələbələrə praktik dərslər də keçmişəm", - deyə S.Rüstəmova qeyd edib.
O, Nigde ilə yanaşı, Ankara Tibb fakültəsinin Anatomiya kafedrasında da tədris prosesini izləyib, bu kafedranın əməkdaşları ilə tanış olub.
Bundan əlavə, proqram çərçivəsində Niğde Ömer Halisdemir Universitetinin rektoru professor Hasan Uslu, Tibb fakültəsinin dekanı professor Üner Kayabaş, Anatomiya kafedrasının müdiri, dekan yardımçısı Selim Çinaroğlu və kafedranın əməkdaşları, Beynəlxalq Əlaqələr koordinatoru Çiğdem Şahin, Hülya Üründü, Ankara Universitetində professor, doktor İbrahim Təkdəmirlə görüşüb.
Görüşlər zamanı universitet təmsilçiləri ali məktəblərimiz arasında mübadilə proqramının gələcəkdə daha geniş vüsət almasına dair arzularını bildiriblər.