Həkim Tatyana Zaxarova qazlı suyun insan orqanizmi üçün gözlənilməz faydalarından danışıb.

Aztibb.az “MedikForum”a istinadən xəbər verir ki, mütəxəssisin sözlərinə görə, qazlı içkilər susuzluğu yatırır və orqanizmi nəmləndirir. Bununla yanaşı, belə su həzm üçün faydalı ola bilər.

"Qazlı suda olan karbon qazı həzmi sürətləndirə bilən mədə turşusunun istehsalını stimullaşdırır", – deyə həkim bildirib.

Bununla belə, o, qazlı su içməyin müəyyən mənfi təsirlərinin olduğunu da vurğulayıb: “Bəzi insanlarda qazlı su şişkinlik və ya mədə yanmasına səbəb ola bilər. Ona görə də mədəsində reflü kimi problemi olan insanlar qazlı içkilərdən uzaq durmalı və ya onları yalnız normada istehlak etməlidirlər”.

Həkim qazlı suyun böyük miqdarda qida rasionuna daxil edilməsinə qarşı xəbərdarlıq edib. Qeyd edib ki, qazlı suyun tərkibində olan karbon qazı diş minasına ciddi təsir göstərərək dişlərin həssaslığının artmasına səbəb ola bilər.