1950-ci ildən başlayaraq hər il aprel 7-də keçirilən

Ümumdünya Sağlamlıq Günündə Ümumdünya Səhiyyə Təşkilatının yaranması qeyd olunur və həmin gün dünya ictimaiyyətinin diqqəti qlobal sağlamlıq üçün böyük əhəmiyyət kəsb edən bir mövzuya yönəldilir.

Aztibb.az xəbər verir ki, 1948-ci il aprelin 7-də Ümumdünya Səhiyyə Təşkilatının yaranmasından sonra dünyanın 194 ölkəsi, o cümlədən Azərbaycan bu təşkilata üzv qəbul olunub.

Ümumdünya Sağlamlıq Günü planetin hər bir sakininin sağlamlığının qorunması və əmin-amanlığının təmin edilməsi üçün birgə fəaliyyət göstərməyə xidmət edən, ictimai səhiyyə məsələlərinə yönələn qlobal bir imkandır.

Həmin günün məqsədləri sırasına sağlamlıq qaydalarına düzgün əməl olunması, səhiyyə məsələlərinin həllində dövlət orqanlarına kömək edilməsi, həkimlərin peşəkarlığının artırılması, düzgün qidalanma, idmanın və düzgün həyat tərzinin təbliği, gənclər arasında sağlam vərdişlərin yayılması, yaşlılara və sağlamlıq imkanları məhdud olanlara güzəştli şəraitin yaradılması, tütünçəkmə, alkoqollu içkilər və narkotik maddələrin zərəri, profilaktik prosedurların təyini və s. kimi məsələlər daxildir.