Gənclər və İdman Nazirliyi "İlin idman yekunları" adlı qala mərasimində daha 3 nominasiya üzrə qaliblər müəyyənləşir.

"Report"un məlumatına görə, ən yaxşı kişi komandaları arasında "Qarabağ" futbol klubu qalib olub. Mini futbol üzrə yığma ikinci, 3x3 basketbol millisisi üçüncü yeri tutub.

İlin ən yaxşı baş məşqçisi "Qarabağ"a rəhbərlik edən Qurban Qurbanov seçilib. Onu yunan-Roma güləşi üzrə milli komandanın baş məşqçisi Aleksandr Tarakanov və bədii gimnastika üzrə yığmanın çalışdırıcısı Siana Vasileva izləyib.

Futbol üzrə FIFA referisi Əliyar Ağayev ilin ən yaxşı hakimi adına layiq görülüb. Cüdo hakimi Nazim Umbayev ikinci, boks hakimi Anar Babanlı isə üçüncü olub.

19:55
Gənclər və İdman Nazirliyi "İlin idman yekunları" adlı qala mərasimi keçirir.

"Report"un məlumatına görə, "Buta Palace" sarayında təşkil olunan mərasimdə artıq 3 nominasiya ilə bağlı qaliblər bəlli olub.

İlin ən yaxşı qadın idmançısı qılıncoynatma üzrə Avropa çempionu və dünya çempionatının gümüş medalçısı Anna Başta seçilib. Şahmat üzrə 20 yaşlılar arasında dünya çempionu olmuş Gövhər Beydullayeva ikinci, IV İslam Həmrəyliyi Oyunlarının qalibi, V İslam Həmrəyliyi Oyunlarının üçqat qızıl, gümüş və bürünc mükafatçısı, Yay Universiadasının ikiqat gümüş mükafatçısı, Tokio-2020 Yay Olimpiya Oyunlarının iştirakçısı Zöhrə Ağamirova üçüncü olub.

İlin ən yaxşı kişi idmançısı nominasiyasında yunan-Roma güləşçisi Eldəniz Əzizli bütün rəqiblərini qabaqlayıb. Şahmatçı Abdulla Qədimbəyli ikinci, cüdoçu Hidayət Heydərov üçüncü yeri tutub.

İlin ən yaxşı qadın komandası adına bədii gimnastika üzrə qrup hərəkətləri komandası layiq görülüb. Voleybolçulardan ibarət yığma ikinci, qılıncoynatma üzrə milli komanda üçüncü yerlə kifayətlənib.