Azərbaycan ilə BMT arasında 30 ildən artıq müddətdə formalaşmış tərəfdaşlıq ölkəmizin sosial-iqtisadi inkişafına və institusional potensialının gücləndirilməsinə mühüm töhfələr verib. 81 il ərzində Birləşmiş Millətlər Təşkilatı sadə bir əqidəyə əsaslanıb: ümumi çağırışlar ümumi həllər tələb edir. Çox az çağırış bunu iqlim dəyişmələrindən daha aydın nümayiş etdirir.

AZƏRTAC xəbər verir ki, bu barədə BMT-nin Azərbaycandakı rezident-əlaqələndiricisi Dmitro Şlapaçenko "Milli səviyyədə müəyyən edilmiş töhfələrin Azərbaycanda icrasının sürətləndirilməsi: Dayanıqlı inkişaf üçün enerji sektorunun dekarbonizasiyasının təşviqi” mövzusunda 9-cu Dayanıqlı İnkişaf Məqsədləri (DİM) Dialoqunda deyib.

O bildirib ki, qlobal iqlim gündəliyi qətiyyətli icra mərhələsinə daxil olub.

“Ölkələr milli səviyyədə müəyyən edilmiş töhfələr (NDC 3.0) kimi tanınan son milli iqlim planları vasitəsilə getdikcə daha iddialı öhdəliklər irəli sürürlər. Hazırkı həlledici sınaq bu iqlim vədlərinin siyasətlərə, investisiyalara və ölçülə bilən nəticələrə çevrilməsidir. Azərbaycanın NDC 3.0 sənədi istixana qazı emissiyalarını 1990-cı illərin səviyyəsi ilə müqayisədə 2035-ci ilə qədər 40 faiz azaltmağı öhdəsinə götürür və əvvəllər 2050-ci il üçün müəyyən edilmiş hədəfi 15 il irəli çəkir. Bu, iddialarda mühüm və təqdirəlayiq artımlardır. İndi əsas prioritet iqtisadiyyat və cəmiyyət üzrə transformasiya dəyişikliyinə təkan verə biləcək icrasıdır. Bu transformasiya bütün iqtisadiyyatı əhatə etməli olsa da, onun mərkəzində energetika sektoru dayanır.

Tərəqqi kompleks yanaşma tələb edir: bərpaolunan enerjinin genişləndirilməsi, enerji səmərəliliyinin artırılması, şəbəkələrin modernləşdirilməsi, metan və digər emissiyaların azaldılması, təmiz texnologiyaların tətbiqi və enerji təhlükəsizliyinin gücləndirilməsi. BMT-nin Asiya və Sakit Okean üçün İqtisadi və Sosial Komissiyasının (ESCAP) dəstəyi ilə hazırlanmış DİM 7 Yol Xəritəsi 2035-ci ilə qədər təmiz enerji, enerji səmərəliliyi və regional yaşıl enerji inteqrasiyası üçün strateji yollar təklif edir. Eyni zamanda, keçid ədalətli, inklüziv və insan mərkəzli olmalıdır. Dekarbonizasiya layiqli iş yerləri yaratmalı, yeni bacarıqlar inkişaf etdirməli, innovasiya və rəqabət qabiliyyətini gücləndirməli, davamlı artımın faydalarının bütün regionlar və ölkə daxilindəki icmalar arasında bölüşdürülməsini təmin etməlidir”, - deyə Dmitro Şlapaçenko vurğulayıb.