Enerji səmərəliliyinin artırılması istiqamətində həyata keçirilən tədbirlər nəticəsində Azərbaycan İstilik Elektrik Stansiyasında hər kilovat-saat elektrik enerjisi istehsalına sərf olunan şərti yanacağın miqdarını azaldıb.

AZƏRTAC xəbər verir ki, bu barədə energetika nazirinin müavini Elnur Soltanov "Milli səviyyədə müəyyən edilmiş töhfələrin Azərbaycanda icrasının sürətləndirilməsi: Dayanıqlı inkişaf üçün enerji sektorunun dekarbonizasiyasının təşviqi” mövzusunda 9-cu Dayanıqlı İnkişaf Məqsədləri (DİM) Dialoqunda deyib.

O bildirib ki, enerji sektorunda dayanıqlı inkişaf yalnız bərpaolunan enerji mənbələrinə investisiyaların artırılması ilə məhdudlaşmır.

“Bu prosesdə enerji səmərəliliyinin yüksəldilməsi, mövcud infrastrukturun yenilənməsi və enerji itkilərinin azaldılması da mühüm əhəmiyyət daşıyır. Bərpaolunan enerji yatırımlarının miqyasına baxmaq kifayət deyil. Dövlətin bu sahəyə kifayət qədər böyük enerji, güc, vaxt və vəsait sərf etməsi də çox vacibdir. İkinci mühüm istiqamət enerji effektivliyidir və Azərbaycan bu sahədə də ciddi addımlar atıb. Azərbaycanın ən qeyri-səmərəli elektrik stansiyası bu gün ölkənin ən səmərəli stansiyasına çevrilib. Əvvəllər bir kilovat-saat elektrik enerjisi istehsalına 330 qram şərti yanacaq sərf olunurdusa, hazırda bu göstərici 220 qramdan aşağıdır. Beləliklə, 30 faizdən çox səmərəlilik artımı əldə etmişik”, – deyə nazir müavini əlavə edib.