Qətərin paytaxtı Dohada keçirilən Sosial İnkişaf üzrə İkinci Dünya Sammiti çərçivəsində COP29 Sədrliyi qismində çıxış edən Azərbaycan BMT-nin Asiya və Sakit Okean üzrə İqtisadi və Sosial Komissiyası (UNESCAP) ilə birlikdə “İqlimədavamlı inklüziv sosial inkişaf üçün insan inkişafının prinsipləri” mövzusunda həll variantlarına həsr olunmuş sessiya təşkil edib.

AZƏRTAC COP29-un saytına istinadla xəbər verir ki, sözügedən sessiyaya UNESCAP-ın Sosial İnkişaf şöbəsinin direktoru Dr. Şrinivas Tata moderatorluq edib. Tədbirdə nazirlər, yüksək vəzifəli rəsmilər və beynəlxalq tərəfdaşların iştirakı ilə təhsil, səhiyyə, ləyaqətli əmək və sosial müdafiə sahələrinin inklüziv inkişafı təşviq etmək üçün ölkələr tərəfindən iqlimədavamlılıq strategiyalarına necə inteqrasiya olunacağı xüsusunda fikir mübadiləsi aparılıb.

Sessiyanın açılışında Azərbaycan Respublikasının baş nazir müavini Samir Şərifov 2024-cü ildə COP29 zamanı təqdim olunan İqlimədavamlılıq üçün Bakı İnsan İnkişafı Prinsiplərini vurğulayaraq bu prinsiplərin milli iqlim və sosial inklüzivlik siyasətlərinə insan inkişafı yanaşmasının inteqrasiyası üçün praktiki çərçivə yaratdığını qeyd edib. O, həmçinin bildirib ki, BMT-nin İqlim Dəyişmələri üzrə Çərçivə Konvensiyasının (UNFCCC) tarixində ilk dəfə olaraq, 18 noyabr 2024-cü il tarixində Bakıda İnsan İnkişafı Günü keçirilib və həmin gün Birləşmiş Krallıq (COP26), Misir (COP27), Birləşmiş Ərəb Əmirlikləri (COP28), Azərbaycan (COP29), Braziliya (COP30) və Ümumdünya Səhiyyə Təşkilatı (ÜST) tərəfindən İqlim və Səhiyyə üzrə Bakı Davamlılıq Koalisiyası təsis edilib.

Bundan irəli gələrək, BMT baş katibinin müavini və UNESCAP-ın icraçı katibi Armida Salsiah Alisjahbana qeyd edib ki, iqlim strategiyalarına insan inkişafı prizmasından yanaşmaq hamı, xüsusən də qadınlar, gənclər, miqrantlar və qeyri-rəsmi sektorlarda çalışan insanlar üçün bərabərliyi, sosial müdafiəni və davamlılığı təmin edir.

Azərbaycan, Braziliya, Filippin və Qırğızıstan nazirləri, eləcə də İndoneziya, Tailand və Monqolustandan yüksək səviyyəli nümayəndələr sosial müdafiə, dayanıqlı urbanizasiya, gender yönümlü siyasət, eləcə də təhsil və səhiyyə investisiyalarının iqlimədavamlılıq planlarına inteqrasiyası üzrə milli təcrübələrini bölüşüblər. Bu təcrübələr inklüziv siyasətlərin icmaların gücləndirilməsi, dolanışığın qorunması və “yaşıl” iqtisadiyyata keçid prosesində heç kimin kənarda qalmaması baxımından necə mühüm rol oynadığını nümayiş etdirib.

Qlobal və regional tərəfdaşlar, o cümlədən Beynəlxalq Əmək Təşkilatı (BƏT), UN-Habitat, BMT-nin Təbii Fəlakət Risklərinin Azaldılması İdarəsi (UNDRR), BMT-nin Avropa İqtisadi Komissiyası (UNECE), ÜST, Asiya İnkişaf Bankı (AİB), Asiya İnfrastruktur İnvestisiya Bankı (AİİB) və Birləşmiş Şəhərlər və Yerli İdarələr Təşkilatı (UCLG) Bakı Prinsiplərinin təşviqinə sadiq olduqlarını təsdiqləyərək, bu prinsiplərin insan yönümlü fəaliyyətə çevrilməsi üçün ölkələri bundan sonra da dəstəkləyəcəklərini bildirib.

Sessiya inklüziv, iqlimədavamlı sosial inkişaf və dayanıqlı urbanizasiya istiqamətində sektorlararası siyasət uyğunluğunun, regional əməkdaşlığın və resurs səfərbərliyinin vacibliyini bir daha ön plana çıxardı. Sessiyanın sonunda Azərbaycan Respublikası Xarici İşlər Nazirliyinin İqtisadi Əməkdaşlıq İdarəsinin rəisi və COP29 Fəaliyyət Gündəliyi Komandasının həmsədri Elmar Məmmədov bunları qeyd edib: “Həll variantlarına həsr olunmuş sessiya bir daha nümayiş etdirdi ki, Bakı İqlimədavamlı İnsan İnkişafı Təşəbbüsünün, o cümlədən Bakı Prinsiplərinin hazırlanmasında iki əsas amil olan inklüzivlik və kreativ yanaşma güclü potensiala malikdir və bu qlobal təşəbbüsün həyata keçirilməsinə müxtəlif səviyyələrdə - qlobal səviyyədə Sosial İnkişaf üzrə İkinci Dünya Sammiti, regional səviyyədə 2026-cı ilin aprelində Bakıda keçiriləcək BMT-nin Asiya və Sakit Okean üzrə 82-ci sessiyası (bu Sammitdən sonrakı ilk regional sessiya), yerli səviyyədə isə 2026-cı ilin mayında Bakıda keçiriləcək və mənzil təminatı, eləcə də insan inkişafı məsələlərinin müzakirə olunacağı 13-cü Ümumdünya Şəhərsalma Forumu (WUF13) çərçivəsində təkan verəcək”.