Ağdam şəhərində Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həlli ilə bağlı yaradılmış Əlaqələndirmə Qərargahının nəzdində fəaliyyət göstərən İdarələrarası Mərkəzin Ekoloji məsələlər üzrə İşçi qrupunun növbəti iclası keçirilib.

AZƏRTAC-ın bölgə müxbiri xəbər verir ki, iclasda İşçi qrupda təmsil olunan müvafiq dövlət qurumlarının nümayəndələri, Ağdam, Füzuli, Xocavənd, Cəbrayıl, Qubadlı, Zəngilan, Ağdərə, Xocalı, Şuşa, Laçın, Kəlbəcər rayonlarında və Xankəndi şəhərində Azərbaycan Respublikası Prezidentinin xüsusi nümayəndəliklərinin, eləcə də Bərpa, Tikinti və İdarəetmə xidmətlərinin nümayəndələri iştirak ediblər.

İşçi qrup üzvləri və dəvət olunan digər qurumların nümayəndələri tərəfindən iclas iştirakçılarına Qarabağ və Şərqi Zəngəzur iqtisadi rayonlarında infrastruktur layihələri həyata keçirilərkən və yaşıllıqların götürülməsi zamanı ekoloji tələblərin icra vəziyyəti, işğaldan azad edilmiş ərazilərdə yerli xammal materiallarına çıxış prosedurlarının sadələşdirilməsi, kənd təsərrüfatı sahəsində görülmüş işlər, bərk məişət tullantılarının idarə olunması haqqında məlumat verilib.

İclasda infrastruktur layihələrinin icrası zamanı ekoloji icazələrin alınması ilə bağlı qaldırılan məsələlər müzakirə olunub. Həmçinin aidiyyəti qurumlar arasında koordinasiyanın və kommunikasiyanın gücləndirilməsi məqsədilə Əlaqələndirmə Qərargahı tərəfindən verilmiş tapşırıqların icra vəziyyəti nəzərdən keçirilib.