Bakı, 29 aprel, AZƏRTAC

Sertifikasiya imtahanından keçə bilməyən tibb işçiləri üçün iş yeri və aylıq tarif (vəzifə) maaşı altı ay müddətində saxlanılacaq. Bu müddət ərzində işçi altı ayın sonunda yenidən sertifikasiya imtahanından keçmək hüququna malik olacaq. Həmin dəyişiklik bu sahədə fəaliyyətin davamlılığının təmin olunmasına və işçilərin hüquqlarının qorunmasına yönəlib. Əsas məqamlardan biri tibb işçilərinin peşə fəaliyyətinin davam etdirilib-etdirilməməsi ilə bağlı məsələnin daha aydın və konkret şəkildə tənzimlənməsidir.

AZƏRTAC xəbər verir ki, bu, Milli Məclisin Əmək və sosial siyasət komitəsinin bu gün keçirilən iclasında müzakirəyə çıxarılan Əmək Məcəlləsində, “Əhalinin sağlamlığının qorunması haqqında”, “Özəl tibb fəaliyyəti haqqında” və “Dərman vasitələri haqqında” qanunlarda dəyişiklik edilməsi barədə qanun layihəsinin birinci oxunuşunda öz əksini tapıb.

Qeyd olunan dəyişikliklər təkcə leksik deyil, eyni zamanda, məna və məzmun baxımından da əhəmiyyətli yeniliklər ehtiva edir. Qanun layihəsinin əsas məqsədi səhiyyə və əmək qanunvericiliyinin təkmilləşdirilməsi, tibb mütəxəssislərinin peşəkarlığının yüksəldilməsi və bu sahədə davamlı inkişafa nail olunmasıdır. Layihə Səhiyyə Nazirliyi tərəfindən hazırlanıb və bir çox aparıcı ölkələrin, o cümlədən Rusiya, Türkiyə, Sinqapur və digər dövlətlərin təcrübəsinə əsaslanaraq işlənib. Sənəd səhiyyə sistemində peşəkar bacarıqların qiymətləndirilməsi və keyfiyyətli xidmətin təmin olunması baxımından əlavə mexanizm rolunu oynayacaq. Mahiyyət etibarilə çoxsaylı fundamental dəyişiklikləri əhatə edən bu qanun layihəsi tibb sahəsində hüquqi bazanın müasir tələblərə uyğunlaşdırılması və səmərəli fəaliyyətin təmin olunması məqsədini daşıyır.

Bu dəyişikliklər Azərbaycanda səhiyyə və əmək sahələrinin hüquqi tənzimlənməsində mühüm mərhələ olmaqla, tibb işçilərinin peşəkar inkişafını stimullaşdırmaq və əhalinin sağlamlıq xidmətlərinə çıxışını yaxşılaşdırmaq baxımından mühüm əhəmiyyət kəsb edir.