Bakı, 17 oktyabr, AZƏRTAC

Düz 4 il əvvəl oktyabrın 17-də Füzuli şəhəri işğaldan azad olundu. Otuz ilə yaxın müddətdə düşmən işğalında qalan Füzuli rayonunu azad edilmiş rayonların rəmzi olaraq “Giriş qapısı” adlandırmaq da mümkündür. Çünki Qarabağın işğaldan azad olunması üçün əvvəlcə Füzuli azad edilməliydi. Rayon strateji cəhətdən mühüm əhəmiyyətə malik olduğu üçün düşmən ordusu həmin ərazilərdə güclü müqavimət göstərirdi. Məhz bu səbəbdən də yuxarı komandanlıq ilk əks-hücum əməliyyatına Füzuli ərazisindən başlamaq barədə əmr verdi. Əsgər və zabitlərin böyük qəhrəmanlığı, fədakarlığı, bölmələrimizin döyüş ruhu və qələbə əzmi düşmənin müqavimətini qırdı. Şəxsi heyətin şücaəti və peşəkarlığı qarşısında aciz qalan düşmən silah-sursatını da ataraq müqavimət göstərdiyi mövqeləri, səngərləri qoyub qaçdı, yaşayış məntəqələrimizdən çıxarıldı. Beləliklə, 2020-ci il sentyabrın 27-də başlanan əks-hücumdan sonra ilk müdafiə xətti yarıldı və döyüş tapşırığı uğurla yerinə yetirilərək düşmənin ön xətti darmadağın edildi. Erməni hərbi birləşmələri “keçilməz “Ohanyan səddi”ndən geri oturdularaq ərazidə ən hündür yerə - Məngələnata dağına sığındı. Həmin yüksəkliyin düşməndən təmizlənərək nəzarətə götürülməsi Ordumuzun uğur qazanmasında mühüm rol oynadı.

Füzulu Şəhəri Günü ərəfəsində AZƏRTAC-ın çəkiliş heyəti Məngələnata dağını və Füzuli şəhərini işğaldan azad edən hərbçilərdən müsahibələr alıb.

Füzulinin işğaldan azad olunmasında böyük şücaət göstərən Azərbaycan Ordusunun hərbi qulluqçularından mayor Zaur Abdullayev həmin günləri belə xatırlayır: “Məngələnata dağı çox mühüm strateji yüksəklik idi. Bu dağda düşmənin silahlı qüvvələri yerləşmişdi, çox güclü istehkam qurğuları vardı. Düşmənin oradan çıxarılması bir neçə saat çəkdi. Rəşadətli Ordumuzun onların üzərinə hücuma keçməsi nəticəsində düşmən silahını, təchizatını qoyaraq geri çəkildi. Hərbçilərimiz Məngələnata dağına gələnə qədər düşmənin bir neçə əsas dayaq məntəqəsini darmadağın etdi. Rəşadətli Ordumuz Alxanlı, Əbdürrəhmanlı kəndlərindən düşməni geriyə çəkilməyə məcbur etdi və düşmənə sarsıdıcı zərbələr endirdi.

Digər hərbi qulluqçu çavuş İlkin Vəliyev deyib: “Biz Füzuli rayonunun Alxanlı kəndindən keçəndən sonra Şpartı düzü istiqamətindən Məngələnata dağında gedən döyüşə başladıq. Azərbaycanın artilleriya qüvvələri döyüşə başladıqdan sonra 30 dəqiqə ərzində düşmənin əsas qüvvələrinə dayanmadan, sarsılmaz zərbələr endirdi. Düşmən artilleriya zərbələrini görəndən sonra mövqelərini tərk etmək məcburiyyətində qaldı. Həmin vaxt bir məqsədimiz vardı: Döyüşdə itki az vermək və torpaqlarımızı azad etmək. Allah şəhidlərmizə rəhmət etsin. Öz doğma torpaqlarımızı düşmən tapdağından təmizlədiyimiz üçün fəxr hissi keçirirəm”.

Füzulidəki döyüşün əhəmiyyətdən danışan hərbi ekspert Azər Bayramovun fikrincə, rayonun işğaldan azad olunması ilə erməni silahlı qüvvələri “bufer zonası”nı itirmiş oldu: “Xankəndinin və Xocavəndin müdafiə olunması üçün düşmən Füzuli şəhərini “bufer zona” kimi görürdü. Belə ki, Azərbaycan Ordusunun həyata keçirdiyi fəaliyyətlər, “Ohanyan səddi”nin yarılması, Füzuli və Cəbrayıl rayonlarının bir neçə kəndinin azad olunmasından sonrakı mərhələdə düşmən Silahlı Qüvvələrimizin əsas hücumunu məhz Füzuli şəhərindən gözləyirdi. Onların əsas məqsədi Azərbaycan Ordusunun qarşısını açıqlıq ərazidə almaq idi”.

Bu döyüşlərdə qalib gələn qəhrəman hərbçilərimiz qələbələri ilə xalqımızı sevindirib, dövlətimiz tərəfindən fəxri adlara, orden və medallara layiq görülüblər. Onlar əməklərinə verilən yüksək qiymətə görə Ali Baş Komandana minnətdarlıqlarını bildiriblər.

Füzulinin azad olunması uğrunda döyüşlərdə iştirakına görə medalla mükafatlandırılan gizir Səid Abdullayev isə deyib: “Ermənilərin keçilməz hesab etdikləri səddi yararaq irəliləsək də, əlverişli strateji yüksəklik olan Məngələnata dağı adlanan ərazi düşmən nəzarəti altında idi. Düşmən həmin strateji yüksəklikdən canlı qüvvə və döyüş texnikasının hərəkətini izləyə bilirdi. Məngələnata dağının təmizlənməsi uğrunda ordu hissələrimizin uğurla yerinə yetirdiyi əməliyyatdan sonra Azərbaycan Ordusu bütünlüklə Füzuli rayonuna nəzarət etməyə başladı.



Bir Ordu mənsubu olaraq Füzulinin işğaldan azad olunması uğrunda aparılan döyüşlərdə fəal iştirak etdiyimə, Ali Baş Komandan tərəfindən medallarla təltif olunduğuma görə qürur hissi keçirirəm”.

Düşmən məqsədinə çata bilmədi. Şəhidlərimiz, qazilərimiz olsa da, Ali Baş Komandan İlham Əliyevin verdiyi əks-hücum əmri uğurla yerinə yetirildi və beləliklə Füzuli şəhəri düşmən işğalından azad edildi. Hədəf isə bütün Qarabağı işğaldan azad etmək idi və bu arzumuza da çatdıq!

Müharibədən sonra azad olunan həmin ərazilərdə böyük abadlıq, tikinti-quruculuq işləri aparılır. Füzuliyə həyatın qayıtması, məcburi köçkünlərin öz doğma torpaqlarına geri dönməsi Prezident, Ali Baş Komandanın yürütdüyü uğurlu siyasətin nəticəsidir.