Limfa düyünləri orqanizmin kiçik bioloji filtrləridir. Onların əsas funksiyası bədəni qorumaqdır. Bütün limfa axını düyünlərdən keçdiyi zaman məhz burada təmizlənir. Axınla gələn zədələnmiş və ya bədxassəli hüceyrələr, yoluxucu mikroorqanizmlər düyünlərdə süzülərək məhv edilir.

Aztibb.az xəbər verir ki, “Caspian International Hospital”ın instaqram səhifəsində kiçik limfa düyünlərinin sağlam insanlarda tez-tez hiss edildiyi, böyük limfa düyünlərinin isə palpasiya zamanı aşkar edildiyi və müxtəlif xəstəliklərin əlaməti ola biləcəyi qeyd edilib.

Bəs bunlar hansılardır?

İnfeksiyalar: Limfa düyünləri qrip, soyuqdəymə, vərəm kimi viral və ya bakterial infeksiyalara cavab olaraq şişir.

İltihab: Limfa düyünləri yaxınlıqdakı toxumalarda iltihaba cavab olaraq böyüyə bilər. Məsələn, diş və ya boğazda infeksiya boyundakı limfa düyünlərini şişirdə bilər.

Xərçəng: Bəzi xərçəng növləri limfa düyünlərini genişlədir. Məsələn, lenfomalar və leykemiyalar limfa sistemində dəyişikliklər yaradır.

Autoimmun xəstəliklər: Revmatoid artrit kimi bəzi autoimmun xəstəliklər limfa düyünlərinin böyüməsi ilə sonuclanır.

Allergiyalar: Allergik reaksiyaların da limfa düyünlərində şişmə yaratması mümkündür.

Əgər bədəndə böyümüş limfa düyünləri varsa və bu vəziyyət iki həftədən çox davam edirsə və ya digər əlamətlərlə müşayiət olunursa, diaqnoz qoymaq və böyümüş limfa düyünlərinin səbəbini müəyyən etmək üçün həkimə müraciət etmək vacibdir. Diaqnozu təsdiqləmək üçün müxtəlif laboratoriya testləri, müayinə və ya limfa düyünlərinin biopsiyası tələb oluna bilər.